 |
| រដ្ឋមន្ត្រីការបរទេសហ្វីលីពីន Perfecto Yasay (រូបថត Xinhua) |
ប្រមុខការបរទេសហ្វីលីពីន Perfecto Yasay នៅថ្ងៃទី១៣ ខែមករា បាននិយាយថា សកម្មភាពណាមួយរបស់អាមេរិកនៅសមុទ្រចិនខាងត្បូង ដែលសំដៅបណ្ដេញចិនចេញពីកោះសិប្បនិម្មិត គឺជារឿងសិទ្ធិផ្ដាច់មុខរបស់អាមេរិក និងជាសកម្មភាពរបស់អាមេរិកតែម្នាក់ឯង។ ការលើកឡើងរបស់ប្រមុខការបរទេសហ្វីលីពីន ធ្វើឡើងបន្ទាប់អនាគតរដ្ឋមន្ត្រីរដ្ឋមន្ត្រីការបរទេសអាមេរិក និយាយថា ចិន គួរត្រូវបានហាមឃាត់ពីការប្រើប្រាស់កោះសិប្បនិម្មិតទាំងនោះ។
មុនការកាន់អំណាចរបស់ប្រធានាធិបតី Rodrigo Duterte រដ្ឋាភិបាលហ្វីលីពីន តែងអំពាវនាវឲ្យអាមេរិកធ្វើសកម្មភាពប្រឆាំងចិន ដែលចេះតែបង្កើតកោះសិប្បនិម្មិតជាច្រើននៅសមុទ្រចិនខាងត្បូង។ យ៉ាងណាក្ដី រឿងរ៉ាវផ្អែមល្ហែមទាំងនោះ ទំនងមកដល់ទីបញ្ចប់ក្រោមអាណត្តិដឹកនាំរបស់លោក Duterte ។ ហ្វីលីពីន ហាក់មានជំហរទន់ភ្លន់ដាក់ចិនជាងមុន និងមិនសូវតវ៉ាខ្លាំងចំពោះសកម្មភាពរបស់ចិននៅសមុទ្រចិនខាងត្បូងឡើយ។
ចំណែកអាមេរិកវិញ នៅតែអះអាងថា សកម្មភាពរបស់ចិននៅសមុទ្រចិនខាងត្បូង ជាពិសេសការកសាងកោះសិប្បនិម្មិត មិនជារឿងល្អឡើយ។ ក្នុងពេលផ្ដល់សក្ខីកម្មដល់គណៈកម្មាធិការព្រឹទ្ធសភា អនាគតរដ្ឋមន្ត្រីការបរទេស Rex Tillerson នៅថ្ងៃទី១២ ខែមករា និយាយថា ចិន គួរត្រូវបានអនុញ្ញាតឲ្យចូលទៅកាន់កោះ ដែលកសាងក្នុងតំបន់ជម្លោះសមុទ្រចិនខាងត្បូងឡើយ។
យ៉ាងណាមិញ ទីភ្នាក់ងារព័ត៌មាន Reuters ផ្សាយថា លោក Perfecto Yasay ប្រមុខការទូតហ្វីលីពីននៃរដ្ឋបាលលោក Duterte បានបង្ហាញគំនិតផ្ទុយគ្នាពីលោក Tillerson ដែលចង់បណ្ដេញចិនចេញពីកោះសិប្បនិម្មិតនោះ។ ក្នុងកិច្ចសម្ភាសន៍មួយនៅថ្ងៃទី១៣ ខែមករា រដ្ឋមន្ត្រីការបរទេសហ្វីលីពីនរូបនេះសង្កត់ធ្ងន់ថា៖ «ពួកគេ និយាយថា ពួកគេនឹងរារាំងចិនពីការចូល ឬប្រើប្រាស់កោះសិប្បិនិម្មិតទាំងនោះ។ ប្រសិនបើពួកគេចង់ធ្វើ និងមានកម្លាំងដើម្បីធ្វើនោះ ពួកគេធ្វើទៅចុះ»។
គួររម្លឹកដែរថា កន្លងមក ប្រធានាធិបតីហ្វីលីពីន Rodrigo Duterte ក៏មិនព្រួយបារម្ភអ្វីឡើយនឹងសកម្មភាពរបស់ចិនក្នុងសមុទ្រចិនខាងត្បូង ជាពិសេសការបង្កើតកោះសិប្បនិម្មិតនោះ។ មិនត្រឹមតែមិនព្រួយបារម្ភឡើយ លោកចាត់ទុកថា សកម្មភាពរបស់ចិនមិនមែនជារឿងធំដុំអ្វីឡើយ។ តែលោកធ្លាប់លើកឡើងថា បើសកម្មភាពរបស់ចិននៅសមុទ្រចិនខាងត្បូង ជារឿងធ្ងន់ធ្ងរ អាមេរិកគួរតែមកជួយ ដើម្បីហាមឃាត់សកម្មភាពក្រុងប៉េកាំង។
ដោយឡែក លោក Yasay ផ្ទាល់ក៏ធ្លាប់អះអាងថា ហ្វីលីពីន មិនអាចបញ្ឈប់ចិនបានឡើយ ហើយមានតែការពង្រឹងទំនាក់ទំនងឲ្យកាន់តែល្អជាមួយនឹងចិននោះទេដែលផ្តល់ប្រយោជន៍មកវិញនោះ។ លោក ពន្យល់ថា ដោយសារតែការពង្រឹងទំនាក់ទំនងល្អជាមួយនឹងចិន អ្នកនេសាទហ្វីលីពីនបច្ចុប្បន្ន អាចទៅនេសាទនៅក្នុងតំបន់ក្បែរថ្មប៉ប្រះទឹក Scarbarough ដែលចិន បានបិទមិនឲ្យចូលតាំងពីឆ្នាំ២០១២នោះ៕
ថ្មីៗ
អត្ថបទ : តន ចាន់រិទ្ធារ៉ា
No comments:
Post a Comment