 |
| គ្រូពេទ្យនៃមន្ទីរពេទ្យកុមារអង្គរ ខេត្តសៀមរាប កំពុងពិនិត្យកុមារដែលមានបញ្ហាបេះដូង កាលពីថ្ងៃទី១២ ខែធ្នូ ឆ្នាំ២០១៥។ |
មន្ទីរពេទ្យកុមារអង្គរ ដែលមាននិមិត្តសញ្ញាបេះដូងពណ៌បៃតង នៅខេត្តសៀមរាប កំពុងបំពេញបេសកកម្មមនុស្សធម៌ ពិនិត្យ និងព្យាបាលជំងឺស្រាល ធ្ងន់ ព្រមទាំងវះកាត់បេះដូងកុមារខ្មែរប្រមាណ ៥០០នាក់ក្នុងមួយថ្ងៃៗ។
មន្ទីរពេទ្យនេះ បានបង្កើតឡើងដោយអ្នកថតរូបជាជនជាតិជប៉ុន ម្នាក់ ឈ្មោះ ខេនរ៉ូ អ៊ីហ្សុ (Kenro Izu) កាលពីអំឡុងឆ្នាំ១៩៩៩ ដែលរហូតមកដល់ឆ្នាំ២០១៧ នេះ គឺមានរយៈពេល ១៨ឆ្នាំហើយ។
តើមន្ទីរពេទ្យនេះមានសារសំខាន់អ្វីខ្លះសម្រាប់សុខភាពកុមារខ្មែរទាំងនៅខេត្តសៀមរាប និងខេត្តជុំវិញ?
ក្រុមវេជ្ជបណ្ឌិតជាតិ អន្តរជាតិ គ្រូពេទ្យ និងឱសថការី ព្រមទាំងមន្ត្រីរដ្ឋាភិបាលប្រមាណជាង ២០០នាក់ បានរួមគ្នាប្រារព្ធខួបទី ១៨ឆ្នាំនៃការបង្កើតមន្ទីរពេទ្យកុមារអង្គរ ក្នុងខេត្តសៀមរាប កាលពីរាត្រីថ្ងៃទី២៨ ខែមករា។
ក្រុមវេជ្ជបណ្ឌិតជាតិ អន្តរជាតិ ដែលមកពីអង្គការផ្នែកសុខភាពជាច្រើន រួមទាំងមន្ត្រីរដ្ឋាភិបាលផង ទទួលស្គាល់ថា មន្ទីរពេទ្យកុមារអង្គរ ដែលមាននិមិត្តសញ្ញាបេះដូងពណ៌បៃតង គឺពិតជាកន្លែងដ៏សំខាន់ ដែលបានជួយព្យាបាល និងសង្គ្រោះជីវិតកុមារខ្មែរដោយមិនគិតថ្លៃក្នុងរយៈពេល ១៨ឆ្នាំមកហើយ។
នាយកមន្ទីរពេទ្យកុមារអង្គរ គឺលោកវេជ្ជបណ្ឌិត ងួន ច័ន្ទភក្ដ្រា។ លោកបានថ្លែងជាសាធារណៈក្នុងពេលប្រារព្ធខួប ១៨ឆ្នាំនៃមន្ទីរពេទ្យកុមារអង្គរថា បច្ចុប្បន្ន មន្ទីរពេទ្យតែងជួយព្យាបាលជំងឺកុមារខ្មែរដោយមិនគិតថ្លៃជារៀងរាល់ថ្ងៃ។ ជំងឺកុមារដែលមន្ទីរពេទ្យអាចព្យាបាលទាំងនោះ ដូចជាជំងឺស្រាលធ្ងន់គ្រប់ប្រភេទ ការវះកាត់បេះដូង ជំងឺមហារីកភ្នែក និងការសង្គ្រោះបន្ទាន់ ជាដើម។
លោកវេជ្ជបណ្ឌិត ងួន ច័ន្ទភក្ដ្រា បញ្ជាក់ទៀតថា ជារៀងរាល់ថ្ងៃ មន្ទីរពេទ្យកុមារអង្គរ បានទទួលពិនិត្យ និងព្យាបាលកុមារប្រមាណ ៥០០នាក់ក្នុងមួយថ្ងៃៗ ហើយសម្រាប់ឆ្នាំ២០១៦ គឺមន្ទីរពេទ្យបានព្យាបាល និងថែទាំសុខភាពកុមារចំនួនជាង ១៧ម៉ឺននាក់៖ «ជាមួយគ្នានេះដែរ មន្ទីរពេទ្យកុមារអង្គរ បានបន្តផ្ដោតការយកចិត្តទុកដាក់លើការបណ្ដុះបណ្ដាលទៅលើការអភិវឌ្ឍចំណេះដឹងរបស់បុគ្គលិកវេជ្ជសាស្ត្រ ដើម្បីធានាលើការព្យាបាល និងថែទាំសុខភាពកុមារ»។
ក្រុមបុគ្គលិក និងនិស្សិតពេទ្យទទួលសញ្ញាបត្រវេជ្ជសាស្ត្រ និងចូលរួមប្រារព្ធខួប ១៨ឆ្នាំនៃមន្ទីរពេទ្យកុមារអង្គរ ខេត្តសៀមរាប កាលពីថ្ងៃទី២៨ ខែមករា ឆ្នាំ២០១៧។ RFA/Hang Savyouth RFA/Hang Savyouth
មន្ត្រីផ្នែកសុខភាព និងអាជ្ញាធររបស់រដ្ឋាភិបាល ក៏ទទួលស្គាល់ដែរថា មន្ទីរពេទ្យកុមារអង្គរ ពិតជាបានបំពេញបេសកកម្មមនុស្សធម៌យ៉ាងធំធេងលើការជួយសង្គ្រោះជីវិតកុមារខ្មែរជិត ២លាននាក់ ក្នុងរយៈពេល ១៨ឆ្នាំមកនេះ។
ប្រធានមន្ទីរសុខាភិបាលខេត្តសៀមរាប លោកវេជ្ជបណ្ឌិត ក្រូស សារ៉ាត់ ថ្លែងថា ក្នុងរយៈពេល ១៨ឆ្នាំមកនេះ មន្ទីរពេទ្យកុមារអង្គរ មិនត្រឹមតែជួយកាត់បន្ថយអត្រាស្លាប់ និងអត្រាឈឺរបស់កុមារក្នុងខេត្តសៀមរាប ប៉ុណ្ណោះទេ គឺមានកុមារជាច្រើនទៀតមកពីខេត្តជុំវិញ ដូចជាខេត្តបន្ទាយមានជ័យ ឧត្តរមានជ័យ បាត់ដំបង ព្រះវិហារ និងខេត្តកំពង់ធំ ផងដែរ។ លោកវេជ្ជបណ្ឌិតមានប្រសាសន៍ទៀតថា ក្នុងនាមលោកដែលជាប្រធានមន្ទីរសុខាភិបាល សូមដឹងគុណយ៉ាងជ្រាលជ្រៅចំពោះបេសកកម្មមនុស្សធម៌របស់មន្ទីរពេទ្យកុមារអង្គរនេះ៖ «មន្ទីរពេទ្យកុមារអង្គរបានចូលរួមទាំងកម្លាំងកាយ កម្លាំងចិត្ត និងកម្លាំងប្រាជ្ញាស្មារតី ធ្វើឲ្យមានការថយចុះនូវអត្រាស្លាប់ និងអត្រាឈឺរបស់កុមារ»។
បច្ចុប្បន្ន មន្ទីរពេទ្យកុមារអង្គរ បានចំណាយមូលនិធិប្រមាណ ៥០ម៉ឺនដុល្លារអាមេរិកក្នុងមួយខែៗ ហើយមូលនិធិមនុស្សធម៌ទាំងនោះ គឺត្រូវការគាំទ្រពីសប្បុរសជន ទាំងក្នុង និងក្រៅប្រទេស។
អភិបាលរងខេត្តសៀមរាប អ្នកស្រី យូ សុភា មានប្រសាសន៍ថា រយៈពេល ១៨ឆ្នាំមកហើយ មន្ទីរពេទ្យកុមារអង្គរបានជួយសម្រាលបន្ទុករបស់រដ្ឋាភិបាល និងអាជ្ញាធរយ៉ាងធំធេងលើវិស័យសុខាភិបាល ជាពិសេសជួយលើកកម្ពស់សុខភាពកុមារ៖ «បញ្ហាសុខភាពជាកត្តាចម្បង និងសំខាន់បំផុតនៃជីវិតមនុស្សគ្រប់រូប មិនថាចាស់ ឬក៏ក្មេងឡើយ»។
បុរសជនជាតិជប៉ុន ដែលផ្ដួចផ្ដើមបង្កើតមន្ទីរពេទ្យមួយនេះឡើង ដោយសារតែភាពក្ដុកក្ដួលរបស់គាត់ទៅលើក្មេងស្រីម្នាក់ ដែលគាត់បានថតរូបរបស់នាង ប៉ុន្តែនៅពេលដែលគាត់ត្រឡប់មកស្រុកខ្មែរម្ដងទៀត ហើយទៅរកក្មេងស្រីនោះ គឺនាងបានស្លាប់បាត់ទៅហើយ។
ស្ថាបនិករបស់មន្ទីរពេទ្យកុមារអង្គរ លោក ខេនរ៉ូ អ៊ីហ្សុ (Kenro Izu) មានប្រសាសន៍ថា ភាពមេត្តា និងក្ដីអាណិតអាសូរទៅលើកុមារខ្មែរ ជាមូលហេតុជំរុញឲ្យលោកត្រូវតែស្វះស្វែង ដើម្បីបង្កើតមន្ទីរពេទ្យមួយនេះឡើង។ លោកបានថ្លែងទៀតថា ចាប់ពីពេលនេះតទៅ លោកចង់ឃើញក្រុមវេជ្ជបណ្ឌិត និងគ្រូពេទ្យដែលបម្រើការនៅក្នុងមន្ទីរពេទ្យនេះ បន្តកិច្ចការមនុស្សធម៌ជួយព្យាបាលជំងឺកុមារខ្មែរគ្រប់រូប ដោយសេចក្តីមេត្តា និងអាណិតអាសូរ៖ «ដូចលោកអ្នកបានឃើញហើយ និមិត្តសញ្ញានៃមន្ទីរពេទ្យដែលមានបេះដូងពណ៌បៃតង គឺមានន័យថា វាប្រៀបដូចជាគ្រាប់ពូជ ដែលត្រូវការដុះលូតលាស់ ហើយក្លាយទៅជាដើមឈើធំ ១ដើម។ យ៉ាងណាមិញ មន្ទីរពេទ្យកុមារអង្គរ ក៏ចង់ឲ្យកុមារខ្មែរមានសុខភាពល្អ ធំលូតលាស់ ដែលពោរពេញដោយក្តីមេត្តា និងការថែទាំចេញពីពួកយើងដែរ»។
បច្ចុប្បន្ន មន្ទីរពេទ្យកុមារអង្គរ មិនត្រឹមតែជួយព្យាបាលកុមារខ្មែរដោយមិនគិតថ្លៃប៉ុណ្ណោះទេ គឺថែមទាំងជួយបណ្ដុះបណ្ដាលបុគ្គលិក មន្ត្រីសុខាភិបាល និស្សិតវេជ្ជសាស្ត្រ និងនិស្សិតគិលានុបដ្ឋាកមកពីទូទាំងប្រទេសកម្ពុជា ឲ្យក្លាយទៅជាធនធានមនុស្សបានច្រើននាក់ទៀត៕
RFA
ដោយ ហង្ស សាវយុត
No comments:
Post a Comment