 |
| លោកនាយករដ្ឋមន្រ្តី ហ៊ុន សែន |
ប្រមុខរដ្ឋាភិបាលកម្ពុជាអះអាងថា ការដែលរដ្ឋសភាប្រជុំដកតំណែងលោក កឹម សុខា ពីប្រធានក្រុមមតិភាគតិចនៅថ្ងៃនេះ ដោយសារតែមានការបកស្រាយខុសគ្នារវាងគណបក្សជាប់ឆ្នោតទាំងពីរចំពោះតួនាទីនេះ។
ក្នុងកិច្ចប្រជុំរដ្ឋសភាដែលមានតែតំណាងរាស្ត្រគណបក្សប្រជាជនកម្ពុជាចំនួន៦៧រូបចូលរួម ដើម្បីធ្វើវិសោធនកម្មបទបញ្ជាផ្ទៃក្នុងលើប្រការ៤៨ថ្មី (បី) លោក ហ៊ុន សែន បានថ្លែងថា តួនាទីជាប្រធានក្រុមមតិភាគតិចក្នុងរដ្ឋសភាដែលមានឋានៈស្មើនាយករដ្ឋមន្រ្តី គឺមានឥស្សរជនតែម្នាក់ទេ ដែលធ្វើជាប្រធានក្រុមតំណាងរាស្ត្រផង និងជាប្រធានក្រុមមតិភាគតិចក្នុងសភាផង។ ក្នុងន័យនេះលោក ហ៊ុន សែន បានអះអាងថា គណបក្សសង្រ្គោះជាតិបានបកស្រាយផ្ទុយពីនេះ ដោយចង់រក្សាទុកឲ្យ លោក សម រង្ស៊ី នៅមានតំណែងដដែល ខណៈលោក កឹម សុខា ក៏មានតំណែងដូចគ្នានេះដែរ។
លោកថ្លែងថា៖ «វាទាល់តែតែងតាំងធ្វើប្រធានក្រុមតំណាងរាស្ត្រសិនទើបជាស្វ័យប្រវត្តិធ្វើជាប្រធានក្រុម[មតិ]ភាគតិច។ គាត់និយាយត្រឹមត្រូវរបស់គាត់ឯកឧត្តម កឹម សុខា។ ប៉ុន្តែគាត់ច្បាស់ជាមិនហ៊ាននិយាយប្រាប់គេប្រាប់ឯងទេ។ តែឯកឧត្តម បើសិនជាបញ្ចេញៗឲ្យអស់! បញ្ចេញមិនអស់ប្រយ័ត្ននៅក្នុងអានេះ[ឧបករណ៍ថតសំឡេង]។ ឯកឧត្តមបញ្ចេញតាអាណាដែលមានប្រយោជន៍ទេ។ ប្រយ័ត្នតាខ្ញុំបញ្ចេញសារទាំងស្រុង គឺឯកឧត្តមត្រូវទទួលខុសត្រូវចំពោះបញ្ហាហ្នឹង។ បើសិនឯកឧត្តមនិយាយ ហើយឯកឧត្តមស្បថឲ្យត្រូវគ្រាប់ងាប់ បើសិនជាខ្ញុំនិយាយមិនពិតព្រោះចូលទៅក្នុងម៉ាស៊ីនរបស់ខ្ញុំ…។ ចឹងសូម្បីតែ CNRP ក៏ដោះស្រាយមិនត្រូវគ្នា»។
យ៉ាងណាក៏គណបក្សសង្រ្គោះជាតិបានអះអាងថា តំណែងទាំងនោះមិនសំខាន់ទេ ហើយគណបក្សប្រឆាំងនេះបានធ្វើពហិកាមិនចូលប្រជុំសភាទេនៅថ្ងៃនេះ។
គួរបញ្ជាក់ផងដែរថា បន្ទាប់ពីអវត្តមានពីក្នុងប្រទេសជាង២ឆ្នាំ និងជាប់បណ្តឹងផ្សេងៗនោះ តំណែងរបស់លោក សម រង្ស៊ី ជាប្រធានក្រុមភាគតិចនៅក្នុងសភា មានឋានៈស្មើនាយករដ្ឋមន្ត្រី ត្រូវធ្លាក់ទៅលើ លោក កឹម សុខា ដែលត្រូវបានលោក ហ៊ុន សែន ស្នើដល់ព្រះមហាក្សត្រ លើកលែងទោសកាលពីចុងឆ្នាំ២០១៦។ ប៉ុន្តែលោក ហ៊ុន សែន និងតំណាងរាស្ត្របក្សកាន់អំណាចបានដកតំណែងជាប្រធានក្រុមមតិភាគតិចនេះពី លោក កឹម សុខា វិញដែលអ្នកវិភាគយល់ថាមកពីលោក កឹម សុខា មិនព្រមថ្កោលទោស លោក សម រង្ស៊ី៕
VOD
ដោយ លោក អុឹង ប៊ុនថន
No comments:
Post a Comment